Close

    Stórurð er ein mesta náttúruperla Íslands en lengi vel var hún lítið sem ekkert þekkt meðal almennings. Undanfarin ár hefur hún notið sívaxandi vinsælda hjá göngufólki sem leggur á sig drjúga göngu til þess að skoða Stórurð og upplifa hrikaleik Dyrfjalla í návígi. Stórurð er mynduð úr risavöxnum móbergs- og þursabergsbjörgum sem fallið hafa ofan á skálarjökul sem legið hefur við Dyrfjöll og má ennþá sjá leifar af honum undir hömrum fjallanna. Jökullinn hefur skriðið niður dalinn undan eigin þunga og björgin borist með honum langa leið. Núverandi ásýnd Stórurðar er mótuð að mestu af síðasta ísaldarskeiði sem lauk fyrir um 10.000 árum. Þegar jökullinn hopaði urðu þessar risavöxnu steinblokkir eftir í dalbotninum og hafa staðið þar óhreyfðar um þúsundir ára. Stórurð er mikil um sig og þar er margt forvitnilegt að sjá. Hægt er að finna þar skjólgóða stóra hellisskúta og ganga um raufir milli risavaxinna kletta. Blágrænar tjarnir er víða að finna og inn á milli rennisléttar grundir. Saman mynda þessi náttúrufyrirbrigði ævintýralega veröld sem lætur engan ósnortinn. Það eru 5 merktar gönguleiðir sem liggja að Stórurð. Frá Héraði, Vatnsskarði, Njarðvík og tvær frá Borgarfirði. Ganga utan merktra leiða í Stórurð getur verið vafasöm í þoku því villugjarnt er á þessum slóðum. Á vetrum er Stórurð mikil snjóakista og því skyldu ferðamenn spyrjast fyrir um snjóalög ef þeir eru á ferðinni snemma sumars. Ekki er ráðlegt að ganga í stórurð án leiðsagnar staðkunnugra fyrr það er orðið snjólétt. Ganga í Stóruð er nokkuð löng, og má í það minnsta gera ráð fyrir 6 klst í ferðina.

    Nú er farið að bjóða upp á gönguskíðaferðir á Borgarfirði. Leiðsögn frá heimamönnum og gist á Blábjörgum á Borgarfirði.

    Travel East bíður upp á frábærar gönguferðir með með hótelgistingu og öllum þægindum á Borgarfirði eystra. Dvalið á Hótel Álfheimum í vel búnum herbergjum með eigin baðherbergi og farið í 6-8 tíma dagsferðir undir leiðsögn heimamanna. Morgunverður og kvöldverður er innifalinn auk nestispakka fyrir gönguferðina. Gengið um fjöll, víðáttur og eyðivíkur þessa frábæra göngusvæðis Víknaslóða og komið heim á hótel í lok dags. Göngurnar eru fyrir alla þá er unna útivist og hreifingu í góðum félagsskap en auðvelt er að bæta við vegalengd og erfileika á eigin vegum ef menn vilja. Ef þú vilt ferðast langt og njóta náttúru, þæginda og afslöppunar þá er þetta fyrir þig. Göngudagar eru m.a. Stórurð hringferð, Brúnavík hringferð og Breiðuvík hringferð.

    Stórurð er sennilega mesta náttúruperlan í nágrenni Borgarfjarðar eystri. Mest farna gönguleiðin í Stórurð liggur frá Vatnsskarði og komið til baka um Njarðvík, eða sama leið gengin til baka. Gera má ráð fyrir amk 6 klst í gönguferð í Stórurð með góðum stoppum. Leiðin liggur hátt þannig það er oftast snjór á leiðinni fram í júlímánuð.

    Borgarfjörður eystri Njarðvík

    Stórurð er perla númer 3 í Perlum Fljótsdalshéraðs. Stórkostlegur áfangastaður sem lætur engan ósnortin.